新冠肺炎肆虐全球,戴口罩係各國專家公認可以有效預防感染新冠肺炎嘅方法,但仲係有人不以為然。印度有位記者為咗提醒途人戴口罩,諗咗條好橋,就係去訪問一隻無戴口罩嘅驢!

近期國外網絡瘋傳一段採訪片段,一位印度記者喺條街度訪問一隻驢,問佢做咩唔戴口罩,隻驢梗係唔識應佢喇。於是呢位記者就走去問一個無戴口罩嘅路人:點解隻驢唔戴口罩通街走?路人好老實咁答佢:因為佢係驢囉。跟住記者就突然反問:「所以宜家無戴口罩通街走嘅係邊個?」一問一答之間就諷刺曬無戴口罩出街嘅人,幽默得嚟又有警醒作用。網友紛紛大讚呢位記者機智,仲留言表示:「這是提高危機意識的創新方法」、「很棒的點子」、「沒有戴口罩出門的人真的很討厭」。

圖:Twitter@iRupND