聽日(82日)就係全民運動日,不過依家香港疫情嚴重戶外做運動都變得奢侈!不如由體能教練周佩欣(Wyan教你幾招,咁就算留喺室內,都一樣可以Keep Fit啦!

留意空間 記得飲水

Wyan本來最喜歡喺戶外做運動,不過由於疫情關係,佢都多咗留喺屋企做運動,以往佢唔會購買家居健身器材,都因為疫情而買咗一支單槓,方便練習引體上升。

Wyan提醒大家,一般人屋企地方唔大,做運動時一定要預留足夠空間,否則好容易撞到傢俬,整傷自己。另外,假如唔開冷氣嘅話,空氣流通無室外咁好,屋內隨時超過三十度,排汗多咗,記得補充足夠的水份同電解。

每日30分鐘 足夠運動量

Wyan亦教大家一系列練習體能嘅方法:

-V up:瞓喺地上,手放喺頭側邊伸直,手同腳一齊向上,做成一個V形,最好手掂到腳,但記住手腳都要伸直,唔可以彎曲,每組10下,可以鍛煉腹部肌肉。

-Squat Jump:首先個人要坐低,好似無影櫈咁,手伸向前面幫助平衡,之後向上跳,同時雙手向下或放在身體側邊,留意腳掌落地時要曲膝做避震,每組15下,可以鍛煉腿部肌肉,加強心肺訓練。

-原地跑:每組30秒。

-開合跳:每組10下。

-掌上壓:每組10 下,假如女仔體能唔夠,可以改做跪膝掌上壓。

就係咁簡單,每日做3組,只需30分鐘,運動量都大致足夠啦,大家加油呀。

圖:受訪者提供

因為疫情關係,Wyan專登買咗一支單槓,方便練習引體上升。


Squat Jump有啲似無影櫈,踎低之後向上跳,可以鍛煉腿部肌肉,加強心肺訓練。