本港新冠肺炎近來每日新增100多個個案,公立醫院壓力大增,醫管局尋日(30號)公布,亞洲博覽館一號場館將會用作社區治療設施,最快會喺48至72小時內啟用,首階段可提供500張病床,主要接收18至60歲患者。醫管局指,場內感染控制符合國際要求,相信唔會構成交叉感染。

港大醫學院內科學系臨床教授孔繁毅指,喺亞博館嘅患者會分流為三個級別,比較嚴重或情況轉差嘅患者會轉去醫院治療;有微燒、輕微病徵或病情穩定者,會留喺亞博館觀察;情況穩定嘅病人就會轉去鯉魚門度假村隔離。留喺亞博館嘅患者每日要接受X光、抽血檢查等,亦需要自行換床單,而出院準則就同公立醫院一樣,兩次相隔24小時嘅深喉唾液檢測呈陰性、無病徵就可以出院。

天水圍醫院急症科顧問醫生李立業補充,亞博館會提供兩個公共位置俾病人休息,提供WIFI,並設有精神支援熱線。而每個床位都有獨立電掣同燈光調節系統,等患者唔會覺得辛苦。

圖:香港政府網頁