相信大家都仲記得,澳洲去年9月發生嚴重山火,呢場山火一燒就燒咗半年咁耐,而且火場範圍非常大,無數動物死亡。世界自然基金(WWF)委託10位科學家研究呢次山火對當地生態嘅影響,最近發表中期報告,發現呢次山火造成接近30億隻動物死亡或者流離失所,係現代歷史上最嚴重嘅野生動物災難之一。

研究由10位分別來自悉尼大學、新南威爾斯大學、紐卡斯爾大學、查爾斯史都華大學、澳洲鳥類協會嘅科學家進行,佢哋檢視山火對1,146萬公頃叢林嘅影響,推算出有近30億隻動物死亡或者流離失所,包括約1.43億隻哺乳動物、24.6億隻爬行動物、1.8億隻鳥類同5100萬隻青蛙,係1月統計數字嘅3倍。

參與研究嘅悉尼大學生態學教授 Chris Dickman表示,研究發現令研究人員感到震驚,30億嘅數字大到難以令人理解,幾乎係全球人口一半數量。佢呼籲當局要改變政策,減低大火破壞當地生物多樣性嘅風險。

原圖:新華社