唔少打工仔、學生都要長時間使用電腦,就有機會患上「滑鼠手」,不過最近港大醫學院發表研究報告,原來遺傳基因都係其中一個致病嘅重要因素。

腕管綜合症俗稱「滑鼠手」,通常都出現喺經常重複進行手部同腕部活動嘅人士身上,除咗用電腦用得多嘅人,建築工人、清潔工人同家庭主婦都有機會患上「滑鼠手」。腕管綜合症嘅主要成因係腕管內嘅正中神經,因周邊組織例如軟組織腫脹、增厚,而受到擠壓,令手部感到痛楚、麻痺同無力。如果無接受合適治療,症狀惡化有機會令手部神經受損、永久性肌肉萎縮,出現喪失功能等情況。

以往有關「滑鼠手」嘅研究,都發現患者有家族性傾向,而歷史上都有唔少家族病例,反映遺傳可能亦都係致病嘅一個重要因素。港大醫學院有份參與嘅研究,針對兩個「滑鼠手」家族,合共接近100名患者,進行臨床診斷、遺傳分析、生化分析到動物模型嘅詳細研究,發現一個名為COMP嘅基因突變,係導致呢兩個家族發病嘅原因,揭示以往未被發現嘅發病機制,為日後研發預防同治療提供新方向。

原圖:FB@HKU Medicine、康衡骨科