政府尋日開始收緊防疫措施,全日禁止食肆堂食,唔少打工仔尤其是地盤工友被迫日灑雨淋喺室外食飯,措施引嚟唔少批評。政府今日宣布,由聽日開始,食肆可以恢復提供日間(即係上午5時至下午5時59分)嘅堂食服務,最多每檯2個人。

政府今日發聲明表示,檢視尋日全日暫停堂食措施嘅實際情況後,明白到措施為上班僱員帶來不便同困難,故此容許食肆恢復提供堂食服務,但鑑於疫情仍然嚴峻,以及考慮到進食嘅時候唔戴口罩帶嚟嘅感染風險,要求食肆採取更嚴謹嘅防疫措施,包括顧客數目唔可以超過通常座位數目一半、每檯不多於2個人,以及餐檯之間要有至少1.5米距離或有隔板分隔等等。每日下午6點至翌日上午4點59分,就要繼續暫停堂食服務。

政府尋晚亦宣布,由今日開始,上午11點至下午3點會開放生效18區19間社區會堂或社區中心,俾市民入內食用自攜午膳。

原圖:RTHK