香港新冠肺炎疫情持續,政府全日禁止食肆堂食法例今日生效,地盤工友等等無辦公室食飯嘅打工仔,唯有喺街邊搵地方食飯,睇見佢哋席地而坐、日曬雨淋,實在令人心酸。好鄰舍北區教會今日中午喺Facebook專頁宣布,將會開放會址,希望提供一個較舒適及環境較佳嘅地方,俾基層工友同無家者休息,同時派發防疫物資同心抗疫。

好鄰舍北區教會又喺帖文呼籲其他教會同有心人士,一齊支援基層朋友需要,共同抗疫。帖文提到,佢哋將於週三至週五(7月29至31日),每日上晝11點至下晝2點,開放位於粉嶺同觀塘兩個會址,地址分別係粉嶺聯和墟聯發街32號舖,以及觀塘寧晉中心16樓G室,呼籲基層朋友帶埋飯盒入嚟拎防疫包添。

另外,位於石門嘅爾雅補習社,尋日亦喺Facebook專頁表示,歡迎無地方進食嘅人帶埋外賣嚟補習社「慢慢食」,仲話「冷氣供應,費用全免」。真係有心,希望更多人仿傚,幫助有需要嘅打工仔同基層人士!

原圖:RTHK、FB@好鄰舍北區教會