82日就係全民運動日,今年嘅全民運動日比較特別,由於疫情嚴峻,大家都盡可能留喺屋企。不過越野跑運動員陳文霞(Samantha)就話,就算喺屋企,其實有好多運動可以做架!

室內做運動 切勿鬆懈

Samantha表示,香港人屋企空間唔大,所以喺室內做運動,一般唔會用專業器具:「我會喺室內做體能運動,保持肌肉良好狀態,同埋做伸展運動,保持肌肉及筋柔靭度。」

Samantha又話,喺室內做運動,好容易會鬆懈,其實無論室內室外都要注意安全,所以一定做Warm up,先開始做有強度運動。同埋喺室外通常都記得飲水,但室內開住冷氣,會以為無咁辛苦而忘記補充水份,所以佢提醒大家,一定要記住每隔15分鐘飲一兩啖水。佢又提醒大家,即使喺室內都要著鞋,因為有啲動作要踩上踩落或者要跳躍,對雙腳都會做成壓力。

另外,由於喺屋企往往只得一個人,無其他人幫手留意動作同位置是否正確,所以最好喺鏡前面做,咁就可以睇到自己姿勢是否正確,以免做成傷害。

用水樽 鍛煉小腿及腳踝

至於問到室內可以做邊幾款運動,Samantha就話其實有好多:「例如可以行樓梯啦,上上落落都係好好嘅運動!」

作為越野跑運動員,Samantha比較著重鍛煉下身,佢會就地取材,例如利用木櫈,再拿兩枝1.5 LITRE水樽,以水樽代替啞鈴,利用木櫈踩上踩落,鍛煉雙腳嘅大髀前後同埋臀部。

另外,佢亦教大家做一啲平衡動作,鍛煉小腿及腳踝嘅力量。只要單腳企,重心腳膝頭微屈,身體微微向前傾,一隻手攞住水樽舉到齊肩,再再慢慢放低手,將水樽交到另一隻手,另一隻手再舉高水樽!

Samantha仲有一招好簡單嘅運動,叫做Single leg hip thrust,唔使任何器材,只要一張梳化或床就得,方法好簡單,將身體倚在床邊,雙手攤開,單腳舉臀,腰同地下成水平,同膝頭成一直角,然後慢慢坐下即可!大家喺屋企嘅時候,都可以試吓架!


陳文霞(Samantha

2019 Fast 50 - 50km 女子第3

2018 Gaoligong by UTMB® RCE 125km 女子第3

2017 Ultra Gobi 400km 女子第3


圖:受訪者提供


Samantha教大家用水樽做練習,只要單腳企,一隻手攞住水樽舉高。


跟住慢慢放低手。

將水樽交到另一隻手。


另一隻手再拎高水樽成!

Samantha提醒大家,記得前腳膝蓋要微曲,後腳直,上身微微向前傾。


Single leg hip thrust好簡單,只要一張梳化或床,將身體倚在床邊,雙手攤開,單腳舉臀,腰同地下成水平,同膝頭成一直角。

然後慢慢坐下即可!


Samantha話,喺室內其實有好多運動可以做。

作為越野跑運動員,Samantha比較著重鍛下半身。


Samantha大約七年前一次偶然機會下,和同事組隊參加「毅行者」後,燃起跑步嗰團火,自此參加多項大型賽事。