香港新冠肺炎疫情嚴峻,由今日開始政府全日禁止食肆堂食,唔少人都憂慮未必個個打工仔都有辦公室,容許買外賣返去食。港鐵公司就表示,承辦商會按照工地環境,提供更多有蓋嘅地方俾工友休息,亦會加設通風設備,加強空氣流通。由相片可見,休息區域設有帳篷、座椅同長檯,可讓工友食飯。另外港鐵同承辦商亦會實施輪流午膳措施,減少工友買外賣和食飯時嘅聚集機會。

港鐵又表示,自疫情開始,地盤就已為工友提供洗手設備,包括洗手液同消毒酒精。

建造業議會亦發信呼籲各承建商、註冊專門行業承造商、註冊分包商,要體察工友嘅工作情況,為佢哋提供衛生、安全、舒適嘅休息及午膳空間,同埋喺可行情況下安排集體訂購飯盒,及彈性午飯時間,減少工友外出及聚集。議會又強烈建議業界採取有效預防措施,包括保持個人及工作環境的衛生、出入工地量體溫、經常清潔雙手、配戴口罩,保持空氣流通及以稀釋漂白水進行日常消毒等等。

原圖:MTR