全球新冠肺炎疫情持續,有研究指肥胖會增加新冠肺炎重症及死亡風險,英國首相約翰遜早前曾經確診患上新冠肺炎,更一度被送入深切治療部,令佢體會到健康嘅重要,最近佢就宣布一系列打擊肥胖措施,並呼籲國民減肥!

英國推出嘅打擊肥胖措施包括:禁止9點前喺電視或網上播放垃圾食品廣告、禁止高脂產品「買一送一」促銷、唔准商店喺收銀處擺放糖果同朱古力、要求大型餐館、咖啡店同外賣店等喺食物上貼上卡路里標籤等。

約翰遜近日喺Twitter上載影片,宣傳「更加健康」(Better Health)活動,佢坦言自己早前患上新冠肺炎、被送入深切治療部,令佢意識到健康嘅重要。佢話減肥好難,但只要作出一啲小改變,全部人都可以變得更健康,減低新冠肺炎帶嚟嘅健康風險,亦可以減輕英國國民保健署(NHS)嘅壓力。

約翰遜早前視察倫敦一間健康中心嘅時候亦表示,自己已經減重1英石(6.35公斤),主要係靠食少啲,但亦都有做運動。

英格蘭公共衛生署早前發表研究,指出肥胖會增加新冠肺炎患者死亡風險,身體質量指數(BMI)介乎30至35嘅肥胖患者較正常患者風險高40%,而BMI超過40嘅患者更高正常患者90%。

原圖:FB@Boris Johnson