踏入7月,香港爆發第三波新冠肺炎疫情,出現大量本地感染確診,唔少個案都同食肆、街市有關,政府亦呼籲市民減少外出食飯、減少去街市買餸,或者一次過買多幾日餸。早前就有網民分享,表示早前喺街市見到一位魚檔檔主,嘲諷戴口罩嘅婆婆講嘢細聲,十分缺德!

政府喺今個月23日開始,實施「室內口罩令」,有網民生效前一日喺Facebook群組「將軍澳主場」發文表示,當日喺尚德街市一間魚檔,見到有一位婆婆戴住口罩向檔主講「要條細魚,唔該」,檔主聽唔清楚婆婆講咩,就嘲諷婆婆「帶住個死人口罩就好心大聲啲啦,咁驚死,世界末日咩,要死就死啦」。最後呢位網民就幫婆婆向檔主買魚,又批評檔主口罩戴得差「戴咗等於無戴,成個口都見到」,而呢位網民聲稱自己最後無幫襯呢間魚檔。

發文吸引唔少網民「派嬲」,批評檔主欺負婆婆、無同理心,亦有網民呼籲等口罩令生效之後舉報有關檔主。

原圖:RTHK