香港新冠肺炎疫情嚴峻,政務司司長張建宗今日聯同幾位官員舉行記者會,宣布收緊4項防疫措施,包括:全日禁止食肆堂食;限聚令由4人收緊至2人;口罩令擴展至室內、室外所有公眾地方;以及關閉體育館、泳池同遊戲機中心。呢4項新措施將於週三(29日)凌晨零時生效,為期7日,至8月4日為止。

食物及衞生局常任秘書長陳松青喺記者會上表示,口罩令只會向未滿2歲人士,或飲食、服藥,身體精神殘疾,或為避免身體受到傷害等合理辯解情況提供豁免,違反口罩令人士可被定額罰款2000元,或最高罰款5000元。被問到做運動或者吸煙會唔會獲得豁免,陳松青就話戴口罩係保護自己同他人嘅措施,除咗飲食或服藥等原因,一律不獲豁免,佢又建議吸煙人士應考慮戒煙。

張建宗表示,過去一週確診個案急升,連續5日確診個案過百,出現唔少源頭不明個案,由於患者會喺僭伏期傳播,短期內隱性傳播難以消失,社區大規模爆發風險非常高。佢又形容呢一波疫情係半年來最嚴峻,未來兩三週非常關鍵,呼籲市民盡量多留喺屋企、減少社交接觸同外出用膳。

原圖:RTHK