受新冠肺炎影響,大家無得去旅行,多咗人去郊外地方抖抖氣,但就成日都有新聞報道遊人行山、去沙灘遊玩之外留低一大堆垃圾。除咗辛苦一班清潔工人清理之外,亦有唔少有心人做義工執垃圾,重新令香港變靚靚!「上山下海執垃圾」就係香港其中一個自發去清理呢啲郊外垃圾嘅義務群組,小編特登搵嚟群組入面其中一位成員Sue做個小訪問,同我哋分享下佢嘅執垃圾經驗~

Sue加入咗「上山下海執垃圾」已經有一年幾,佢好記得有一年香港打風,將石澳情人橋都摧毀,有團員就喺情人橋附近嘅石灘發現一塊大過一張單人床嘅浮箱。原來呢嚿浮箱嚟自附近嘅魚排,真身係一塊實心發泡膠,表面睇好似塊普通岩石咁,幾乎已經同個石灘融為一體。Sue同其他幾位成員就帶架撐去鋸開做幾小塊,分幾袋運出去最近嘅垃圾站。Sue表示,佢哋會優先處理發泡膠類嘅垃圾,因為發泡膠好易碎,碎咗之後會被其他海洋動物比如海鷗、魚、龜等吞食,影響佢哋嘅健康。


石澳情人橋發現嘅大浮箱(受訪者提供)


團員合力將浮箱送去垃圾站(受訪者提供)

其實Sue同一班有心人不辭勞苦咁周圍去執垃圾,除咗想為環境出一分力,仲希望參與執垃圾嘅人可以從中思考垃圾嘅來源,從而慢慢改變自己嘅生活習慣,做到源頭減廢。Sue話,其實香港人喺呢方面做得比其他地方好,我哋好容易就組織到一班人行動、又多解決方法,所以一齊做呢件事亦相對慳力。就正如佢哋群組嘅宗旨咁「要play就要pay」,我哋遊玩嘅同時亦要付出一啲嘢,對佢哋嚟講,到處去執垃圾就係佢哋嘅pay。希望大家去郊外遊玩之後,都可以做到「要play就要pay」,環境帶俾我哋歡愉,我哋亦要盡自己一分力回饋大自然。

圖:受訪者提供,FB@上山下海執垃圾 GoGo Clean Up