17歲嘅少年本來應該意氣風發,可惜一場電車事故奪走咗佢嘅生命。20年後,眾人對少年依然念念不忘,佢嘅父母更收到一封遲嚟嘅「情信」,令佢哋明白少年生前嘅另一面……

日本綜藝節目《ザ!世界仰天ニュース 》早前播出一個關於東京日比谷電車脫軌事故嘅故事,17歲嘅少年富久信介自小品學兼優,無論讀書、運動都好出色,從來唔使父母擔心。不過同大部分青春期嘅男仔一樣,信介叛逆,好少同父母溝通,更加唔俾父母出席自己嘅比賽。之後信介遇到電車事故身亡,點知20年後,佢嘅父母突然收到一封信。

呢封信係一個5歲囝囝嘅媽媽寫嘅。20年前,呢位媽媽仲係一個女高中生,佢搭電車嘅時候經常會收到癡漢騷擾,信介發現之後,每次都會幫佢擋走呢啲癡漢。女仔亦都因為咁對信介有好感,不過因為唔知信介有無女朋友,所以一直都無勇氣表白。直至女仔睇到新聞見到死者名單有信介嘅相,同埋以後都見唔到信介,佢就知道信介已經不在人世。其實喺事發當年,女仔已經寫信去信介所在嘅拳擊會,不過當時拳擊會已經搬遷,信被打回頭。直到足足過咗20年,呢封信先輾轉送到信介嘅父母手上。信入面話:「這個世界真的有英雄!你們的兒子信介,真是一個優秀又帥氣的人啊!」信介嘅父母非常感謝女仔呢封遲來嘅「情信」,呢封信對信介父母嚟講,雖然又再勾起傷感嘅回憶,但佢哋至少知道,平時忘落冷淡嘅仔,原來都有咁溫暖、體貼嘅一面。

圖:tomihisa,《ザ!世界仰天ニュース 》截圖