連日嚟,本港新冠肺炎確診人數每日破百,全城人心惶惶,尤其係確診者嘅住處、去過嘅餐廳等更加係高危地方,大家都想清潔工人可以徹底消毒防止受感染。不過,清潔工人著住防護衣、冒住被感染嘅風險喺高溫下工作已經好辛苦,最近更有清潔工喺工作期間中暑入院,但唔少人依然唔體諒,故此觀塘油麗選區區議員王偉麟團隊呼籲大家:「多一分體諒,多一分感謝」。

大埔廣福及寶湖選區區議員連桷璋之前喺facebook專頁發帖指,疫情下唔少居民緊張居住環境衛生,而清潔工友亦花足心神認真工作,十分辛勞。連桷璋更親眼見過喺廣祐做清潔嘅工友,全日無停手無食過飯直到收工,中間有人中暑要送院,仲要唔止一個。呢班清潔工友收入卻極為微薄,佢呼籲大家,如情況允許可贈送物資,同工友共同面對「疫境」,更加唔好隨手將口罩掉喺𨋢口。

觀塘油麗選區區議員王偉麟團隊近日亦喺facebook專頁發文指,有街坊埋怨清潔部清洗樓層時無清洗門外地面,甚至係鐵閘下嘅門隙。團隊就解釋,油麗邨嘅清潔工人人數唔多,加上屋邨大廈數目頗多,難以短時間内清潔所有樓層。眼見近日清潔工著住保護衣,冒住生命危險、酷熱天氣清潔消毒,團隊希望街坊唔好因小事而抹煞背後工友嘅努力,呼籲大家喺疫情下「多一分體諒,多一分感謝」。

圖:FB@連桷璋