香港新冠肺炎疫情再次爆發,各區出現多宗確診個案,政府同專家都呼籲市民減少外出。由「深水埗明哥」陳灼明經營嘅「北河同行」最近喺Facebook專頁表示,因應疫情發展,佢哋曾經諗過到底應唔應該繼續派飯,但最終佢哋都係決定繼續堅持,仲話「希望可以服務長者到直到真的走不下去的一刻」。

北河同行嘅Facebook專頁提到,佢哋恆常服務嘅南昌邨同富昌邨,已經陸續出現確診個案,再加上佢哋嘅服務對象正正就係長者,不禁令佢哋要諗下應唔應該繼續派飯。最終佢哋決定繼續,但為咗減低傳播風險,佢哋只會將飯盒掛喺長者屋企門外,撳一下門鐘見到長者安好就會揮手道別,雖然無法同長者慢慢傾計,但為咗佢哋安好,就唯有忍耐一下。

佢哋又提到,服務露宿者嘅義工,亦會加強防疫,希望大家都可以健健康康。唔少網民都感謝明哥同佢嘅團隊無私奉獻,並祝願大家都可以平安健康。

原圖:FB@北河同行