新冠肺炎疫情打擊香港經濟,失業率攀升,今年畢業生搵工難上加難。適逢政府今日正式展開兩年一度嘅助理文書主任公開招聘計劃,最近失業或者啱啱畢業仲未搵到工嘅年輕人不妨一試!公務員事務局表示,計劃兩年內會招聘大約2000位助理文書主任,調派到各決策局及部門工作,負責一般行政支援、文書職務同提供前線服務。

助理文書主任薪酬為總薪級表第3點(每月港幣15,560元)至總薪級表第15點(每月港幣31,750元),申請人須通過技能測驗,包括中文及英文文書處理速度測驗,以及一般商業電腦軟件應用知識測驗,先會獲邀參加遴選面試。而獲邀出席面試申請人,亦需要參加《基本法》筆試,筆試表現會佔申請人整體表現嘅一個適當比重。

具體入職要求已經上載至公務員事務局嘅網站(www.csb.gov.hk/tc_chi/recruit/7.html),申請人可以經網上申請,或者填妥申請表格(GF 340 (3/2013修訂版))郵寄到公務員事務局一般職系處遞交申請,截止申請日期為8月6日。GF 340申請表格可以喺公務員事務局網站(www.csb.gov.hk/tc_chi/recruit/application/331.html)下載,或喺民政事務總署各區民政事務處民政諮詢中心或勞工處就業科各就業中心索取。

原圖:RTHK