俗語話「能醫不自醫」,不過又唔係絕對嘅!四川省遂寧市第一人民醫院骨科醫生曾江華,早前就用左手為自己右手做微創手術,做完手術之後休息2日就重新投入工作,網民大讚醫術高超!

曾江華去年右手腕患上橈骨莖突狹窄性腱鞘炎,大約3個月前痛楚加劇,無法舉起拇指,佢原本諗住搵同事幫手做手術,但考慮到做完傳統手術之後要休息2個禮拜先至好返,佢唔想耽誤出診,再加上佢主攻顯微外科,並有研究腱鞘炎嘅微創手術,於是佢就決定自己幫自己做手術。

喺7月7日,曾江華用左手為右手腕消毒同局部麻醉,就用手術刀割開患處上嘅皮膚同肌肉,大概用咗幾分鐘就完成手術,最後由同事幫佢包紮傷口。

曾江華坦言,下刀嘅時候要克服心理障礙,始終係自己同自己開刀,第一次落刀嘅時候都係比較輕手、唔夠狠,於是又要再落刀割第二次,佢形容感覺就好似割棉布咁。曾江華形容,手術順利,微創手術傷口只有大約3毫米,唔需要縫針,只要包紮兩日就自然癒合,好快就可以重新投入工作,希望日後可以呢個方法治療病人,咁佢哋就唔需要住院喇。

有網民大讚曾江華醫術高超,呢個手術除咗需要技術,更需要勇氣,又讚佢夠敬業。

原圖:紅星新聞