新冠肺炎疫情打擊香港經濟,早前政府公布最新失業率升至6.2%,屬超過15年高位。踏入畢業季節、中學文憑試(DSE)過去週二放榜,再加上第三波疫情爆發,預料失業率將會進一步攀升。香港青年協會表示,應放寬「展翅青見計劃」門檻,至持有大學學位嘅15至29歲青年,又建議政府增設1,500個涵蓋更多唔同行業嘅有時限職位,協助青年就業。

青協督導主任鄺穎琦認為,近年青年嘅學歷雖然係高咗,但未必搵到相配嘅工作,需要從事一啲非專業、低技術工作,佢形容呢種情況係「向下流」。「展翅青見計劃」係透過勞工處、僱主同服務機構,為15至24歲,學歷喺副學士或以下嘅離校青年,提供職前同在職培訓,由於而家大部分副學士畢業生都選擇繼續升學,導致參加人數太減,鄺穎琦建議將服務對象,放寬至持有大學學位嘅15至29歲青年,幫助佢哋就業。

另外,政府早前喺「防疫抗疫基金」預留60億,喺公私營唔同界別創造大約3萬個有時限職位,鄺穎琦指出呢啲職位只針對個別學科,例如環保、樓宇測量等等,佢又建議增設1,500個有時限職位,涵蓋資訊及通訊科技、創意工業、社區服務等更多行業。

原圖:FB@人人有本事 - 勞工處「展翅青見計劃」