莫文蔚早前推出粵語新作《呼吸有害》,而呢首亦係電視劇《飛虎2之雷霆極戰》嘅主題曲,推出無耐就大受歡迎,登上各大音樂平台嘅排行榜第一位。最近莫文蔚就推出咗《呼吸有害》嘅終極版MV,MV以歌曲嘅Live Version製作,而畫面就係以居家隔離為主題嘅2D動畫,喺呢個抗疫艱難時刻撫慰人心。另外,莫文蔚亦決定發行《呼吸有害》慈善限量 CD SINGLE + CASSETTE 套裝,扣除成本之後,將收益捐俾受影響嘅演藝同行,共度時艱。

喺《呼吸有害》終極版MV嘅故事入面,有一位小女孩因為疫情關係要喺屋企隔離,諗起無法喺戶外享受新鮮空氣,而感到悶悶不樂,家中嘅貓咪為咗令小女孩開心返,就用「貓步」彈琴,同鄰居鋼琴家、鍾意唱歌嘅人,一齊將象徵「愛」嘅音樂,傳遞到每個人嘅家裡。

莫文蔚喺Facebook專頁分享呢段MV,表示世界上好多人嘅生活都出現咗難以預料嘅變化,我哋彼此努力適應,更希望可以盡快恢復最初嘅模樣,能夠盡情享受呼吸,希望藉住呢首《呼吸有害》,撫慰眾人心靈,俾大家力量。

《呼吸有害》終極版MV:https://youtu.be/kp6uB5dwugo

原圖:YouTube@莫文蔚 Karen Mok、FB@莫文蔚 Karen Mok