近年有唔少餐廳、食肆都推出比較環保嘅「植物肉」產品,KFC最近亦推出由植物肉製成嘅漢堡。除咗植物肉之外,KFC更宣佈同俄羅斯3D生物列印公司3D Bioprinting Solutions合作,將推出史上第一款利用雞肉細胞、植物原料製作嘅人造炸雞,期望可以喺今年秋天做最後測試。

肯德基表示,隨著時代演進,人們對食物營養同健康生活日益講究,加上環保意識崛起,令更多人開始追求替代肉類嘅方案,所以佢哋希望打造出比傳統肉類更環保,且味道、外型皆同KFC炸雞塊相似嘅產品。其實佢哋早喺舊年已經同植物肉公司Beyond Meat合作,推出純素食嘅「超越炸雞(Beyond Fried Chicken)」,呢款新炸雞喺亞特蘭大試驗推出後大受好評,唔夠5個鐘頭就售罄。

3D生物列印技術可以透過生物墨水(bioink)列印各種身體組織甚至係器官,原本主要用於醫療領域。不過3D Bioprinting Solutions嘅創辦人Yusef Khesuani就表示,3D生物列印技術宜家喺肉類等食物生產領域亦越來越受歡迎。

根據美國《環境科學與技術》雜誌研究顯示,培養肉只係消耗傳統肉類嘅一半能源,可減少96%嘅溫室氣體,仲慳返99%嘅土地。而肯德基亦指出,3D生物列印嘅培養肉唔單止對環境友善,喺保存肉類原始風味嘅同時,又可避開農業及畜牧業對植物、動物使用藥物或添加物,對消費者嚟講亦更健康。

圖:KFC官網