隨住本地爆發第三波新冠肺炎疫情,唔少公司都開始採取在家工作(WFH)模式,不過有一間公司唔止即刻叫員工WFH,更發放超過2780蚊津貼俾僱員買WFH嘅設備同防疫用品,真係羨慕死一大班打工仔!

有個打工仔喺Facebook專頁「奴工處」投稿,大讚公司喺疫情期間嘅應對做得好好。首先喺第三波疫情爆發嗰陣,公司已經即刻宣佈重啟WFH。同層有同事確診,公司即刻通知同事離開辦公室,強制在家工作14日,再即日消毒辦公室。如果有同事接觸過新冠肺炎患者,亦需要強制自我隔離14日。第四個措施係禁止超過4個人嘅會議。

以上四大措施都只係屬於基本嘢,重點來了。如果同事需要返公司,每人每日會有一個口罩不特止,每人更有100蚊美金(約780港幣)買方便WFH嘅設備,仲有2千幾蚊津貼用嚟買防疫用品,好似口罩、消毒用品等等。

呢個post一出,網民都好羨慕呢位打工仔,紛紛大讚呢間公司,仲表示自己都想入去做添。同時亦引來網民分享自身情況:「我公司每人每日一個口罩已經係皇恩浩蕩」、「我公司一個口罩都唔會派」、「我本身番5日,由於WFH我變左要番兩個星期6日」、「我公司淨係識cut人」、「公司宜家都無反應再每日出外勤見客揮手」。

圖:Shutterstock