近期受肺炎疫情影響,大家都不敢出街了,不過日日困喺屋企,又係咪健康呢?如果有一處地方,遠離繁囂,空氣清新,遊人唔多,仲要山水秀,你話幾好呢!其實香港真係有呢種地方,二澳就係其中一個例子,大家可以趁假期到呢度放鬆一下!

二百年古村    荒廢多年

一聽二澳個名,相信大家都會聯想到大澳,無錯,二澳就係位於大澳嘅南面!呢度有一條古村二澳村,已有超過200多年歷史,隨住時代改變,村民陸續遷出農田荒多年。一直到2013年,一班喜愛大自然朋友組成「二澳農作社」,同村民合作展開二澳復耕計劃,並根據地勢環境,重新造田,定期舉辦各類農耕、環保生態活動。

二澳農作社經理莫先生同我哋講:「農作社係由一班志同道合嘅人組成,我哋見到香港對本地蔬菜有一定嘅需求,希望可以話俾香港人知,香港都可以有農業,亦希望香港蔬菜唔使完全靠外地供應。」


二澳位於大澳嘅南面,呢度有一條古村二澳村,已有超過200多年歷史,有4分3個維園咁大。

開墾與保育 取得平衡

咁究竟二澳係一個點樣嘅地方?莫先生就讚不絕口:「二澳係一個山谷地,村口對出就係一片大海,可以話係山明水秀。而且二澳啲水好靚,雖然呢度無自來水,但山水直接落到村,足夠飲用同灌溉!最緊要係呢度附近無廢車場,又無住宅真正自成一國!」

至於二澳村就有43個維園咁大,當中稻米田規模更可能係全港最大。除咗種植稻米之外,夏天會種南瓜、冬瓜、節瓜、茄子,冬天就會種菜,例如生菜、菜心、白菜,另外,仲會種植蘿白、紅菜頭、薑、洛神花、辣椒等等。佢哋亦會同本地廚師合作,製造XO醬料。

莫先生強調,為咗保留呢度嘅生態環境,佢哋並無將所有土地變做農田,反而刻意保留開村時留低嘅水池同濕地,令蜻蜓、魚可以喺水池繁殖,而植物就可以喺濕地生長。莫先生話:「我哋重視村嘅生境,希望種植開墾同保育做到平衡,本來我哋嚟開墾前,發現呢度生境好單一,我哋希望做到物種多元化,有植物、昆蟲、雀鳥,有蛇、貓頭鷹、麻鷹、田鼠等,形成完整嘅生態鏈。」


二澳係一個山谷地,村口對出就係一片大海。


喺呢度睇日落,真係靚到爆!


二澳啲水好靚,雖然呢度無自來水,但山水直接流落到村,足夠飲用同灌溉!


二澳村嘅稻米田,規模更可能係全港最大。


除咗種植稻米之外,呢度夏天會種植各種瓜類,包括冬瓜、節瓜、茄子等。


佢哋仲會種植洛神花,同埋舉行洛神花工作坊。


到咗冬天亦會種菜,包括生菜、菜心、白菜。

踏入夏季 蛙類繁殖期

二澳農作社會定期舉辦各種活動,包括農耕體驗、生態導賞、文化導賞,亦有啲係季節限定嘅活動,例如割禾、插秧、洛神花工作坊,仲有野營添,莫生先話:「過去幾年我哋都有舉辦雙子座流星雨體驗營,反應好好!」

雖然由去年年尾開始,二澳農作社嘅團體活動都被迫暫停,不過二澳村仍然對遊客開放,大家可以嚟參觀,亦可以預約活動,莫先生強調佢哋會跟足政府指引。

就算唔參加活動,呢度都有大把嘢睇,因為每逢78月,就係蛙類繁殖期,割禾之後同插秧前,蛙類會喺注滿水嘅稻田繁殖。而夏天亦係蝴蝶、蜻蜓、蜘蛛、蟬嘅活躍期,經常可以睇到佢哋嘅蹤跡。喜歡影相嚟話,現時稻田正重新犂田,大約7月尾8月頭就會插秧,到時就會變成一片青綠色,啱晒鍾意打卡嘅人。

提提大家,二澳並無車路直達,大家要由大澳步行過來1小時,不過每逢星期六日,二澳農作社會安排渡輪接載遊客,由大澳過來只需要7分鐘啫!莫先生亦寄語大家:「希望大家嚟到可以盡量融入大自然,享受環境,體驗鄉郊生活。」

圖:二澳農作社


嚟呢度仲可以露營,自己帶營又得,用佢哋提供嘅亦得。

每逢7、8月,就係蛙類繁殖期。

呢度仲有農耕體驗,大約7月尾8月頭可以學插秧。


到咗8月,稻田就會變成一片青綠色,啱晒鍾意打卡嘅人。

當稻米成熟,變成金黃色,又係另一番景象!


每逢星期六日,二澳農作社會安排渡輪接載遊客,由大澳過來只需要7分鐘!