全球暖化問題日趨嚴重,冰川融化、海平面上升已經嚴重威脅到極地動物生存、沿岸居民嘅生活。有國際研究更指出,北極熊預計或將會喺80年內滅絕!

據國際期刊《自然氣候變遷》一份研究指,目前北極地區嘅暖化速度係成個地球嘅兩倍,導致當地大量海冰融化,而一直依賴海冰捕獵嘅北極熊嘅狩獵時間亦被迫減少,需要面對糧食不足嘅問題。唔少北極熊缺乏食物,被逼同類相殘以獲得食物生存,甚至有雄性北極熊開始攻擊雌性同幼崽,亦有北極熊媽媽食咗自己嘅仔女嚟充飢嘅情況發生。

目前全球大約有2.6萬隻北極熊,被國際自然保護聯盟列為「易危到瀕危」級別物種。研究結論估計,目前喺北極圈附近生存嘅13個北極熊族群,有12個族群將會喺80年內因氣候暖化陸續消失,最快到2040年,好多北極熊可能會面臨繁殖問題。

圖:FB@Kerstin Langenberger Photography