一提起「建造業」就令人聯想到一班喺地盤日曬雨淋地工作嘅工人,去年6位從事建造業嘅女仔組成「築夢女生」,開設Facebook專頁,分享建造業嘅工作點滴,打破建造業由男人主導嘅刻板印象。

6位築夢女生全部來自俊和建築唔同崗位,佢哋分別係Pinky、Sabrina、Sandra、Sweetie、Tammy、Tiffany。早前Pinky、Sandra同Sweetie接受訪問,佢哋分別喺公司擔任安全主任、勞資主任同管理培訓生(Management Trainee)。

被問到佢哋入行之前,有無擔心過地盤嘅工作環境唔適合自己,佢哋都話無。其中Pinky仲話,自己性格外向,之前喺一啲室內地方工作覺得比較悶,經朋友同家人介紹下入行,發現呢一行都幾有趣,可以接觸到唔同嘅人同事。而大學主修土木工程嘅Sweetie,早喺大學揀科嘅時候,已經覺得呢一科比較實踐性,可以應用自己數理知識、見到實物,好有成功感,而佢亦好鍾意同人交流、性格活潑、好陽光,覺得地盤呢種工作環境好適合佢。

(築夢女生Pinky)

(築夢女生Sweetie)

一般人都會覺得,地盤工人大多都係粗粗魯魯、粗口橫飛,不過佢哋就明言「講粗口唔代表無禮貌」,認為地盤工友雖然粗魯,但其實只係較為直接、直率,而且好多都對女仔好好,可以話係「鐵漢柔情」。Sandra就話,平時同工友上堂嘅時候,聽到工友之間講各式各樣說話、粗口,就會明白到其實佢哋講粗口並無惡意。

(築夢女生Sandra)

「築夢女生」呢個組合喺去年7月組成,希望可以帶出更多建造業資料同知識俾大家,亦希望可以吸引更多女仔入行,其實建造業都有唔同範疇,唔止係工程師,仲有環保、安全、勞資等等範疇。佢哋覺得女仔嘅性格喺工作上都有幫助,一來細心啲,二來亦都可以改善到工作嘅氣氛,希望將來會有多啲女仔入行。

圖片來源:築夢女生

(六位從事建造業嘅女生組成「築夢女生」分享工作點滴。)

(佢哋喺地盤負責唔同嘅崗位。)

(建造業有唔同範疇嘅工作都非常適合女生。)