新冠肺炎疫情喺全球多國爆發,不過喺印度,仍然有部分人認為病毒恐慌只係一場騙局、唔願意戴口罩。印度有一份報章,喺頭版附送一個口罩,鼓勵讀者戴口罩,引起民眾關注。

呢份報章係查謨(Jammu)同克什米爾地區(Kashmir)夏季首府斯利那加(Srinagar),當地一份烏爾都語報紙《Roshni》,日前喺頭版附送口罩,喺口罩旁邊寫上「使用口罩好重要」,又話「通過呢種方式,唔單止你自己,你周圍嘅人都可以免受冠狀病毒侵害」,呢個舉動引嚟其他傳媒同網民大讚。

報章嘅總編輯Zahoor Shora表示,佢哋希望向公眾發出要戴口罩嘅信息,今次專誠請咗好多員工幫手包裝口罩,同埋貼喺每份報章嘅頭版,佢哋仲專登提早3個鐘頭完成報章嘅印刷工作。

有網民表示,呢份報章喺當地每份售2盧比(約港幣2毫),但仍然每份都送口罩,證明佢哋真係好希望鼓勵讀者去戴口罩,網民又感謝報章嘅善行。

原圖:Twitter@@Huzaifa_Aamir