今日係中學文憑試(DSE)放榜日,取得好成績固然係好事,但考得唔好亦唔使愁,人生仍然有好多唔同出路。循道衞理優質生命教育中心最近製作咗一段影片《「失敗」U聯盟》,搵咗4位當年喺高級程度會考(A-Level)英語運用科攞U嘅考生,分享經歷,鼓勵喺DSE未能考取好成績嘅同學仔,唔好灰心、唔好氣餒。

喺片段入面,四位受訪者分別而家做緊銀行接待員、中學社工、德國公司工程師同Party Room及餐廳東主。其中,做緊中學社工嘅Jacky,喺中學嘅時候已經目標清晰,立志做社工,當年考完A-Level英文攞U,於是就升讀高級文憑,畢業後就成為社工。佢笑言,自己比起其他人讀3年degree先入行,自己係快過人哋入行,佢認為自己呢段時間雖然人工較低,但認識到一班好同事,令佢更清楚做社工係咩一回事,工作兩年之後佢修讀學士課程,就更明白課程內容,反而喺讀大學呢幾年先感受到咩先至係真正嘅學習。

而家係Party Room及餐廳東主嘅Tony就勸勉考生,唔好為改變唔到嘅事情傷心,日後仍然有其他途徑升學,或者出來就業,只要再努力就可以。佢仲話,路唔係剩係得一條,只要搵到適合自己嘅路,都一樣可以成功。

影片連結:https://youtu.be/_c548cxMCc0

原圖:YouTube@Life Education生命教育