新冠肺炎疫情再次喺香港爆發,特首林鄭月娥早前就宣布大部分公務員在家工作(work from home),又呼籲企業仿傚,減少病毒喺社區傳播。有部分打工仔就覺得在家工作時工作效率低咗,有唔同研究發現,原來改變一個小習慣,就可以提升工作效率㗎喇。

在家工作對唔少打工仔嚟講,慳返搭車同裝扮時間,夠晒方便。不過英國赫特福德大學心理學教授Karen Pine嘅研究發現,唔同衣著都有唔同嘅象徵意義,就好似著西裝同著便服咁,著唔同嘅衫就會有唔同嘅心情,而著睡衣自然就會想瞓覺,所以想做嘢效率高,就千祈唔好著睡衣做嘢喇!

另外,美國卡尼基美隆大學嘅研究發現,光線充足嘅環境亦能提升工作效率,佢哋曾經做過實驗,搵一班學生喺日光充足嘅課室學習,佢哋嘅計算同閱讀速度都比起其他學生高。所以我哋平時在家工作,只要拉開窗簾、開著檯燈,亦可以提升到工作效率。

原圖:LinkedIn