聽日(22號)就係DSE放榜日,各位考生準備好未呢?鑒於最近本港新冠肺炎確診人數持續上升,教育局局長楊潤雄尋日(20號)表示,期望學校首要利用網上公布成績,意味住今屆中學文憑試將會係歷史上第一次以電子形式發成績單。中學校長會主席鄧振強表示,據佢了解,學校會爭取8時半前成功發送電子成績單到學生電郵,亦會為學生提供電話輔導。

鄧振強表示,過去學校會喺放榜日朝早6時45分收到有整體學生成績單pdf檔案嘅密碼,今次只係要將整體成績單分割成個別學生嘅成績單再電郵俾學生,相信問題不大。至於學生輔導問題轉為電話輔導,鄧振強指:「難度一定高咗,因為學生猶疑要唔要輔導時,面對面就可以見到直接輔導佢哋。」佢又指,現時報讀課程可以喺網上報名,相信聽日唔會出現大問題。

圖:大公網