今日就係DSE放榜嘅日子,當然係有人歡喜有人愁!考得好嘅,自然可喜可賀,但考得差嘅,都唔好氣餒!去年考DSE嘅「劍球王子」黃梓軒,決定喺升學之外走另一條路,一年過去,佢仍然努力向夢想進發,並寄語今屆考生,最緊要搵到人生目標。

參加活動 更有自信

綽號「王子」嘅黃梓軒,自細讀書成績都只係一般,小學時更有讀寫障礙,但佢並無因此而自卑,剛好相反,自細就好動怕悶嘅佢,升讀中學後不斷參與各種活動,包括羽毛球、雜耍等等,只要見有活動就參加,既可解悶又可結識多啲朋友,而個人亦都變得更有自信。

後來喺機緣巧合之下,「王子」接觸咗劍球,一玩就愛上咗,幾乎一有空堂就會攞出嚟玩。「王子」表示:「我覺得自己有呢方面嘅天份,希望向呢方面發展,之前好多活動都係玩玩下,玩完又轉玩另一樣,但只有雜耍同劍玉,我一直玩到今日。」

參加比賽 追尋夢想

就喺去年準備考DSE期間,香港花式劍球協會會長李浩翔決定參加「今生不做機械人」青少年創夢計劃,並搵咗「王子」同另外三位成員組成「劍玉兄弟」參賽。「王子」獲得邀請之後,幾乎完全無考慮就決定參加,因為佢覺得呢個係一次難得嘅機會:「本身以為劍球只係一項興趣,未必可以做終身職業,但參加呢個計劃,發現劍球都可以成為創業嘅機會,呢樣嘢成為咗我嘅人生目標。」

「王子」喺DSE期間專心讀書,等到考完之後就全身投入「劍玉兄弟」嘅計劃,上網搜集資料、到各地推廣劍球等等,計劃多多,而最終「劍玉兄弟」亦成為「今生不做機械人」青少年創夢計劃嘅十隊優勝隊伍之一,獲提供2萬元起動基金、半年專業指導同相關協助,佢哋不但設計咗本地劍球牌子「劍玉兄弟」,9月更會開設Pop-up Store,一步一步向住夢想進發。

依家佢不但有開班教授劍球,亦報讀毅進文憑課程,繼續充實自己,而佢亦不忘勉勵今屆嘅考生:「就算自己讀書唔係咁好,都唔好氣餒,只要搵到自己嘅人生目標,盡力去試,就可以創自己嘅夢想!」

圖:王子、LOOOP.HK

「王子」同另外4位成員合組「劍玉兄弟」,參加「今生不做機械人」青少年創夢計劃,追尋夢想。


「王子」覺得自己對劍球有天份,希望向呢方面發展,甚至以此為職業。


綽號「王子」嘅黃梓軒,自細讀書成績都只係一般,喺機緣巧合之下接觸咗劍球,一玩就愛上咗。


「王子」喺去年奪得NKC南京盃亞軍。


考完DSE之後,「王子」就全身投入「劍玉兄弟」嘅計劃,出席不同推廣活動,包括上電台接受訪問。


中學畢業之後,「王子」亦有返學校教一班師弟學習劍球。