今年嘅DSE考生,注定係最特別嘅一群,因為佢哋面對非一般嘅中六,社會事件、肺炎疫情,都令佢哋嘅學習同心情大受影響。聽日就係DSE放榜嘅日子,相信好多考生都有啲忐忑不安,不過同為今年考生,剛剛成為傑出青少年運動員選舉第1季度得獎者嘅羽毛球選手高城熙,就表示對放榜抱平常心,唔會俾自己太大壓力。

比賽年年有  DSE一生一次

本來作為學生兼運動員,高城熙既要訓練,又要返學,要兼顧並不容易,但受到肺炎疫情影響,高城熙不但唔使返學,連訓練同比賽都停頓晒,有兩個月時間可以留喺家中溫習,也可說是「因禍得福」:「一開始知道比賽取消,係有少少可惜嘅,但後來諗深一層,反而覺得好好彩,因為比賽年年都有,但DSE可能係一生一次,DSE重要得多,所以突然多咗時間溫書,我哋算係比較幸運。」

不過,DSE遲遲未確定幾時開考,都曾經令佢有少少困擾。「一直唔知幾時開考,令我有啲心急,好想一切快啲回復正常,有時溫溫吓書都會集中唔到,呢種不確定的確對溫習一定嘅影響。」因此佢坦言平時好少留意新聞,因為怕影響心情。佢仲話考完之後,有種「大步檻過」嘅感覺。

面對聽日嘅DSE放榜,高城熙表示,會抱住「平常心」面對:「我唔會畀自己太大壓力,盡咗力,對得住自己就得啦。」

任何困難 都可克服

作為學生運動員,其實高城熙在考DSE之前,已經決定咗自己嘅路向,佢希望能夠讀大學商科,並且一邊讀書一邊繼續做運動員。「如果唔好彩入唔到心儀大學,都唔會考慮去外國讀書,到時我會做全職運動員。」

長遠來說,高城熙仍然會以運動為優先,最少俾自己五六年時間去爭取成績,之後會睇睇可否向教練方向發展,因為佢真係好喜歡體育。

對於今屆考生,佢就好鼓勵大家:「我自己都係今屆考生,相信其他考生都同我一樣,呢個中六經歷咗好多事情,幾乎無返過學學習,但係大家好都努力留喺屋企自學,大家都無因此而放棄,其實咁樣已經好足夠!今次呢個難關,相信大家以後都唔會忘記,希望大家以後遇到任何困難,都會記得中六呢一年,咁即使面對任何難題,都一樣可以克服到。」

圖:受訪者提供

受到肺炎疫情影響,高城熙不但唔使返學,連訓練同比賽都停頓晒。


高城熙多年來都有為喇沙出戰學界,去年12月,佢為喇沙奪得學界男子雙打冠軍。

去年佢亦代表香港參加亞洲青年羽毛球錦標賽。