中學文憑試(DSE)將於週三(22日)放榜,我哋邀請到學友社學生輔導中心註冊社工張煒瑜先生,同大家分享一啲放榜貼士。

張煒瑜建議,DSE考生要喺放榜前準備好「行動計劃表」,將自己預期好嘅同唔好嘅成績寫低,制定方案,審視大學聯招(JUPAS)揀選課程嘅排位,之後喺23至25日期間、自己所屬嘅時段內,點樣排高、排低。

報讀自資院校方面,張煒瑜就話,今年唔少自資院校都因為疫情關係,取消舉行即場收生日,並改為網上申請,提醒同學要及早準備好個人資料電子版,而面試亦有機會喺網上進行。坊間有啲院校聲稱DSE成績未達33222,都可以入讀學士學位課程,張煒瑜提醒考生報讀呢啲課程之前,要先上網查下資歷認可,睇下課程有無認可同埋屬於資歷架構邊個級別。

雖然今年放榜改由網上發放成績,學校會以其他形式例如電話等,繼續提供輔導服務,亦會安排老師或社工喺學校stand by,輔導有需要嘅返校學生。而學友社亦設有輔導熱線:25033399,受過訓練嘅輔導員義工聽電話,同考生一齊制定合適嘅升學方案。

原圖:RTHK、學友社