近日香港新冠肺炎疫情再次變得嚴重,單喺週六下晝4點至凌晨12點,短短8個小時就已經有超過100宗確診個案。疫情之下人心惶惶,亦令病毒檢測量大增,尋晚有人喺Facebook專頁「公務員secrets發佈短片,可以見到化驗室外走廊已經放晒一袋袋、一箱箱樣本,等待化驗。

影片題為《新冠肺炎幕後》,說明又提到,半年來越來越多化驗同事加入,但仍然不勝負荷。佢仲話,每日工作十幾個鐘,已經令多名同事疲於奔命。

衞生防護中心傳染病處主任張竹君尋日喺疫情記者會上亦表示,現時病毒檢測中心壓力大,會優先檢測有病徵嘅樣本,呼籲接受檢測嘅市民耐心等候結果,同埋時刻等候結果。佢又提到,私家醫院檢測名額緊張,呼籲無病徵嘅人士唔好同有病徵嘅人搶名額,因為無病徵時檢驗,就算結果呈陰性都唔代表無病,過去就有個案檢測結果為陰性,但過兩日之後先驗出陽性或開始發病。

原圖:FB@公務員secrets