迪士尼開番無幾耐,又要暫停開放啦!大家又少咗個好去處!而東涌線嘅欣澳站,一般人印象中都覺得係轉車去迪士尼嘅中轉站,本身無乜好行,表面睇又啱喎,因為一出車站,不但無商場,連間士多仔都搵唔到,除咗巴士站之外就乜都無!不過,其實呢度有條海濱長廊,可以行到去陰澳灣同鹿頸村,沿途景色唔錯,仲有大把打卡位添!

欣澳原名陰澳

欣澳站所在地,其實正確名稱係陰澳,由於陰澳灣係一個內港,因此昔日被用作儲存木材,並設立咗好多木廠,陰澳木塘係儲存木材地方,以浮住一排排木材而聞名,後來北大嶼山公路及填海工程,令陰澳原本嘅面貌改變咗好多,依家大部分浮木已經消失。

多個打卡點

首先大家可以坐港鐵到欣澳站,出閘向前走,就會見到一條石堤壩,呢度就係起點啦,想去陰澳灣同鹿頸村,就要向左沿住堤壩行,不過沿途既無瓦遮頭又無樹蔭,怕曬嘅就要留意啦!另外,呢條路不但行人,單車同私家車都會使用,大家真係要小心呀!

沿住提壩一路行十幾分鐘,就會到達盡頭,呢個時候你會到有幾條木插咗喺海灣上,呢度就係陰澳灣,而木柱亦係打卡嘅靚位!

影完相,就可以右轉入山徑,全程都係水泥路,而且無乜上落斜,基本上零難度,行咗十幾分鐘,就會見到一個小石灘,靠近岸邊有好多浮木,有鐵鏈綁起半浮沉喺水面上,又係另一個打卡熱點。打完卡後就正式進入鹿頸村,呢度仍然保持鄉村風貌,大家可以好好細味郊外嘅淳樸氣息。

跟住大家就可以原路返欣澳站,來回唔使2小時,喺炎炎夏日又想郊遊出身汗,呢度係唔錯嘅選擇!

圖:LOOOP.HK


想去陰澳灣同鹿頸村,就要向左沿住堤壩行,沿途既無瓦遮頭又無樹蔭。


呢度就係陰澳灣啦!


有幾條木插咗喺海灣上,係打卡嘅靚位!


行到盡頭就可以右轉入山徑,全程都係水泥路,而且無乜上落斜,基本上零難度。


行咗十幾分鐘,就會見到一個小石灘。


靠近岸邊有好多浮木,有鐵鏈綁起半浮沉喺水面上,又係另一個打卡熱點。


打完卡後就正式進入鹿頸村。


跟住就可以行到去碼頭,可以喺度休息一陣。