將垃圾棄置到海上,唔止破壞環境,仲傷害到無數嘅海洋生物。日前喺孟加拉,有超過160隻欖蠵龜連同大量垃圾被海浪沖上沙灘,孟加拉環境部門隨即派人到場救援,發現大部分海龜都被垃圾纏住、傷痕累累,其中大約30隻被發現嘅時候已經死亡,救援人員將屍體埋喺沙灘,場面令人傷心。

外媒報道,孟加拉環境部門日前發現有超過160隻欖蠵龜,連同大量膠樽、漁網、浮標等垃圾被沖到沙灘,當局估計呢啲垃圾重達50噸。有大約30隻欖蠵龜已經死亡,保育人士Asaduzzaman Sayem就表示,有部分海龜被發現時,已經失去鰭足或頭部。

環境部門副主任Nazmul Huda形容,咁大規模海龜擱淺或死亡事件,係「前所未見」,有部分海龜被放回大海之後又返嚟沙灘,估計佢哋情況相當虛弱,無氣力留喺海中。

原圖:FB@Asaduzzaman Sayem