新冠肺炎疫情再次喺香港爆發,醫護人員仍然日以繼夜咁喺前線抗疫,不過最近就有網民分享佢護士朋友被酒店拒絕接待嘅經歷,聽見都覺得心酸。

有網民喺Facebook專頁「公務員secrets」發文,表示佢護士朋友即將要入dirty team工作,於是就book定沙田某酒店準備入住。點知入住嘅時候,前台職員就好似審犯咁,問佢朋友點解book兩星期、邊度返工,當時佢朋友都好體諒對方嘅憂慮,就如實回答。

直至夜晚,呢位網民嘅朋友就收到酒店經理電話,再問佢咩職位、咩部門,又叫佢調房,期間態度好差、「成個爛仔咁」。當時佢亦表示「唔好勉強」、「不如我退房啦」,而個經理就話「我哋會好難做」,但後來佢就收到訂房平台酒店安排退款嘅通知。佢形容經理態度好離譜,言語之中好唔尊重醫護人員。

之後帝都酒店證實事件,對事件表示萬分歉意,會作出檢討並加強員工培訓,又強調「十分感謝各界醫護人員在此非常時期的無私奉獻」,但為保障現有客人同員工安全,帝都酒店未能招待「於過去十四日內,曾與確診/疑似/懷疑新冠肺炎患者有密切接觸的人士」。

原圖:FB@公務員secrets、FB@Royal Park Hotel