有唔少人都會買二手書,一來平啲,二來亦可以減少浪費,為環保出分力,如果好彩嘅,話唔定可以執到寶添!喺英國,一名男子Andy Hewson就喺慈善商店以0.5英鎊(約4.9港元),買咗一本《哈比人》舊書,其後發現原來係初版書,佢擺上網拍賣,結果以1.6萬英鎊(約15.6萬港元)賣出。最後佢用咗呢筆錢嚟開咗個攝影展,實現夢想,又用嚟支付買樓首期。

英國《衛報》報道,Andy喺2012年某一日,趁食lunch嘅時候去到公司附近一間動物福利慈善商店閒逛,期間有一對開露營車嘅夫婦,捐出幾百本舊書俾呢間慈善商店,Andy隨即就見到托爾金嘅《哈比人》,佢早前咁啱整唔見咗本新嘅,於是佢就用0.5英鎊(約4.9港元)買咗呢本舊書。

後來佢搭車返公司睇書嘅時候,佢公司財務部嘅同事行過見到,就同佢講「你呢本書睇落好舊,應該查下值幾錢」,於是Andy真係上網查,一查之下發現呢本原來就係《哈比人》嘅第一版,於1937年出版,當時只係出版咗1500本,而且呢個版本書套仲要印錯咗《愛麗絲夢遊仙境》作者個名Charles Lutwidge Dogson,將「Dogson」錯印成「Dogeson」,當時出版商就將多咗嘅e塗走,而Andy亦發現有塗走嘅痕跡。

Andy意識到手上呢本《哈比人》咁矜貴,佢就等一個好時機去賣,隔咗幾個月《哈比人》電影上映,佢就放上網拍賣,佢原本諗住賣500英鎊(約4900港元),點知拍賣會將起拍價定咗喺3000英鎊(約2.9萬港元),最終成交價達1.6萬英鎊(約15.6萬港元)。喺佢女朋友鼓勵之下,佢舉辦攝影展,完成夢想,又將剩低嘅錢用嚟俾買樓首期。

原圖:Tolkien Library