正所謂「知人口面不知心」,識咗好耐嘅朋友都唔一定了解佢嘅為人。就好似深圳一個女網民咁,去餐廳食飯嗰陣,同行男友人竟然喺佢個杯度落藥,好彩得餐廳店員發現,及時解救,否則後果不堪設想!

呢位女網民早前喺微博發文指,佢同一個識咗4年嘅趙姓男友人一齊去一間日式火鍋店用餐。點知,趙男趁住女網民去拎飲品嘅時候偷偷喺佢個杯度倒入一包白色粉末,仲急急腳用手指攪拌,神色慌張。好彩呢一幕被店員睇到晒,即刻私底下提醒女網民。隨後店員仲好醒目咁以幫手加水為由收走水杯,keep起證據。店員之後仲傍住女網民,偷偷保護佢,店長隨後擔心女網友離開餐廳後會有危險,仲安排店員暗中護送女網友安全離開。

事發後,網友紛紛讚揚呢間餐廳嘅義舉,店長就回應話:「保護女性,這是我們應該做的。」而為咗避免下一個受害人出現,女網友決定發文公開成件事。原來趙男喺國外買嘅呢隻藥係用嚟提高女性性慾個,本來係為女友而買,但就出於獵奇心理偷偷向女網友落藥。趙男事後向女網友道歉,並願意作出任何賠償,但女網民就拒絕原諒,將事件交俾警方處理,並公開事件,等其他潛在受害人見到類似事件嘅危害。

圖:微博@封面新聞