新冠肺炎又再喺社區爆發,多個確診者感染源頭不明,市民又要開始在家抗疫。不過藝人古巨基一早就已經實行在家抗疫,事關佢舊年年尾榮升爸爸之後,為咗囝囝Kuson健康著想,佢同太太已經164日無出過家門,將感染嘅風險減到最低!

古巨基早兩日喺個人社交平台分享慶祝結婚6周年嘅點滴,貼出一家3口嘅溫馨相片,仲透露已經164日無出過門。早排疫情放緩,本來以為可以出關嘅古巨基為咗囝囝健康著想,都係繼續留家抗疫,仲話:「Kuson的健康比我倆任何事都重要,我們真的不敢冒任何風險。」雖然一直留喺屋企湊仔,古巨基亦不忘工作,一直用視像通話開會,並因應疫情安排員工留家工作。佢更呼籲大家「希望大家盡量減少社交活動多Stay home,如外出請常戴口罩」。

圖:IG@leoku