喺新冠肺炎疫情期間,香港街上大部分市民都有戴口罩,不過喺外國,就唔係個個都認同戴口罩嘅作用喇!喺美國,一名反口罩嘅男子Richard Rose,非常抗拒戴口罩,佢仲曾經喺網上揚言唔會買「該死的」口罩,同時佢亦如常繼續參加Party、去酒吧,最終真係感染到新冠肺炎,幾日之後病逝。

外媒報道,37歲嘅Richard Rose係一名反口罩人士,由疫情開始以嚟,佢都表示自己唔會買亦唔會戴口罩,批評戴口罩係炒作、電視上都係新冠肺炎消息同新聞,充滿負能量。喺佢嘅Facebook帳戶,可以睇到佢多次打卡參加Party,又同朋友去酒吧飲酒,期間眾人都無戴口罩。

喺7月1日,佢突然喺Facebook宣布自己病得好嚴重,並且有新冠肺炎嘅症狀,佢相信係參加泳池Party嘅時候受到感染。喺同日下晝,佢收到確診嘅消息,需要接受隔離,有網民問佢有咩感覺,佢話自己「幾乎無法呼吸」、有2日無瞓覺,最終喺7月4日病逝。

有網民形容事件諷刺,又指無知係世上最危險嘅事,亦有網民表示希望大家引以為鑑,記得戴口罩。

原圖:FB@Richard Rose