香港連續多日出現多宗新冠肺炎本地感染確診個案,疫情有再次爆發嘅跡象。特首林鄭月娥尋晚聯同多位官員,宣布咗一系列防疫措施,包括關閉遊戲機中心、健身室等12類處所;限制食肆入座人數,每日下午6時至翌晨5時不設當食,只准外賣;收緊限聚令,禁止多於4人群組聚集;以及規定乘搭公共交通工具人士必須戴口罩。

以上措施將以實施7日為基準,將於7月15日凌晨0時生效。喺新措施之下,迪士尼同海洋公園都需要關閉,海洋公園宣布喺今日(14日)開始關閉至7月21日,而迪士尼就表示會由聽日(15日)起暫時關閉,度假區內嘅酒店就會維持開放。

康文署亦宣布,將由聽日(15日)開始,暫停開放室內體育設施、戶外康樂場地及設施,直至另行通告,同時取消7月份餘下嘅所有康樂、體育及文化活動。

原圖:RTHK