人只要有夢想,幾時去追都唔遲!美國馬里蘭州一個24歲男子Rehan Staton,高中畢業之後就喺清潔公司做回收垃圾嘅工人,正當佢覺得人生無希望之際,工友鼓勵佢讀返書。結果Rehan唔單止GPA爆4,更獲得哈佛大學等多間知名院校錄取,認真勵志!

Rehan屋企經濟唔好,8歲嗰年媽媽就離家出走,爸爸一個人打3份工養大佢同哥哥,好多時都食唔飽,冬天返學好困難,亦都因為咁,Rehan嘅成績好麻麻。佢嘅夢想係做職業拳擊手,不過後來因肩膀受傷而夢碎。Rehan之後考唔到大學就去咗一間清潔公司做回收垃圾工人,維持生計。有同事見到佢年紀輕輕,做垃圾工人太浪費,紛紛鼓勵佢讀返書再考大學。Rehan受到鼓勵,一邊返工一邊讀書,喺2014年考上Bowie State University,GPA仲爆4。

Rehan嘅哥哥Reggie,見到細佬咁生性成績又好,自己毅然放棄大學學業,做全職垃圾工人以支付細佬嘅學費。皇天不負有心人,Rehan今年同時獲哈佛大學、哥倫比亞大學等知名學府取錄。佢最後選擇喺今年秋季入讀哈佛大學攻讀運動法(sports law),以另一種方式圓當初嘅職業拳擊手夢。

圖:Twitter@Rehan Staton,EdTrust