前嗰排,因為政府向市民派口罩嘅關係,令郵差工作量大增,但就幫到唔少有需要嘅人士。喺印度,就有一位郵差過去30年每日都要步行15公里送信到偏遠嘅部落,途中經過森林同河流,仲試過被野獸追添!上個禮拜佢正式退休,而佢嘅故事就被當地一名官員分享至Twitter,唔少網民紛紛要求政府為佢頒獎。

呢位郵差叫D. Sivan,現年65歲,已經做咗郵差30年,咁多年嚟每日都行15公里,由喬奧諾奧爾(Coonoor)附近嘅Hillgrove郵局,行上尼爾吉里(Nilgiri)山區鐵路路軌,走到去偏遠嘅部落區域為當地嘅農場工人送信或者養老金,可以話係任重道遠。

D. Sivan長年喺荒郊野外工作,不時都被野獸追,包括大象、熊、野牛等等,但多年嚟都完成佢送信嘅職責。早年曾經有電視台訪問過佢、跟埋佢去送信,見證佢嘅工作係幾咁辛苦。有網民知道佢要退休,紛紛喺網上稱讚佢嘅奉獻精神,有網民認為佢值得國家表揚,應以佢嘅名字命名當地郵局,甚至向佢頒授「BHARAT RATNA」(印度國寶勳章,一級公民榮譽獎)。但亦有網民批評,郵政多年嚟忽視D. Sivan安危,不但無提供車輛,仲要D. Sivan冒住被野獸襲擊嘅風險送估。

原圖:Twitter@banasinghpvc