有時見到其他人,尤其是外國人,姓名串法比較獨特,一旦讀錯咗場面就會非常尷尬。最近求職平台LinkedIn就推出咗錄音功能,用戶可以將自己個名嘅正確發音錄低,再上載到個人資料頁面,咁樣之後見工或者其他社交場合,就可以減少出現尷尬情況啦!

有咗呢個新功能之後,用戶就可以透過LinkedIn嘅Android或iOS手機應用程式,去錄自己不多於十秒嘅姓名錄音,放喺自己嘅個人資料頁,任何人無論係用網頁版LinkedIn定係LinkedIn嘅應用程式,都可以點擊收聽。LinkedIn仲建議用戶,要喺較少噪音嘅環境下錄,講清楚每個音節。

有份研發呢個新功能嘅產品經理Joseph Akoni表示,呢個新功能有助加深雙方了解,佢仲話讀啱個名就可以留下唔錯嘅第一印象。

原圖:LinkedIn