喺結婚呢啲人生大事,咁梗係要叫晒啲最重要嘅人嚟觀禮啦,不過喺日本有一位新娘除咗請嚟親朋好友之外,仲準備咗個靚位俾陪伴佢多年嘅公仔添!新娘媽媽見到都覺得好無奈,但既然女兒係主角,最後都無阻止。

早前有一位日本網民喺Twitter貼圖發文,表示自己好鍾意《角落生物》嘅蜥蝪公仔,平時喺屋企都攬住唔放,早就當佢係屋企人咁看待,所以嚟到結婚呢一日,就將佢放喺親戚嘅觀禮席上。呢位網民仲話,媽媽見到就話「發生咩事」,但最終都無反對,最搞笑嘅就係外國牧師同啲親友都爭住同呢隻公仔合照。

張相發佈之後,引嚟唔少網民留言,有網民大讚呢隻公仔得意,有網民仲話第時都要好似樓主咁預埋公仔參加自己嘅婚禮,亦有網民好幽默咁話,呢隻公仔被放喺角落,係名符其實嘅「角落生物」。

原圖:Twitter@mammothjiro