喺新冠肺炎疫情期間,長時間停課影響到學生嘅學習進度,構成學習壓力,再加上留喺屋企嘅時間多咗,容易同屋企人磨擦。社交網站Facebook最近推出「#HearForYou同行計劃」,同多個本地社福機構合作,提供精神健康資訊,以及支援機構推出聊天機械人,讓市民尤其是青少年,可以隨時獲得資訊,及時紓緩情緒。

「#HearForYou同行計劃」現時支援5個本地社福機構,包括明愛青少年及社區服務、香港青年協會、聖雅各福群會、撒瑪利亞會同加油香港,Facebook向呢啲機構提供技術支援同免費培訓,等佢哋可以接觸到有需要嘅人士,以及設立主題網站提供健康資訊同網上評估。

Facebook早前已經為明愛青少年及社區服務同埋青協,設立聊天機械人「輔助小精靈」,聊天機械人會為用家評估「快樂指數」,再轉介同社工傾計。明愛青少年及社區服務暨社區發展服務總主任陳偉良表示,試用咗呢個聊天機械人一個月,有近150人用過,佢發現夜晚8點至凌晨1點比較多人需要協助,聊天機械人全天候運作,可以補足佢哋真人服務嘅不足,同埋用家向聊天機械人提到嘅資料,包括煩惱種類、心情等等,都可以幫到社工同用家打開話題。

原圖:HearForYou