本來香港係個爭分奪秒嘅地方,不過,大家每日衝衝衝嘅時候,有無諗過慢番落嚟,好好感受身邊嘅小事物呢?嘉道理農場喺園內嘅藝舍舉辦疫情下首個體驗式畫展,以「日出日樂」為主題,呈現年輕藝術家兼繪本作者劉妍汶(Carmen)離開大都會轉投山林嘅內心世界,正好讓因疫情被迫慢下腳步嘅人,好好認識生活。

透過畫展 探索心境

劉妍汶加入嘉道理農場以來,負責藝術教育及自然體驗活動。今次嘉道理農場喺疫情下重開,劉妍汶亦希望透過畫展,分享佢以繪畫探索環境與心境嘅瞬間:「日出日落有周而復始嘅意思,我將『落』改成『樂』,因為覺得日落唔一定代表失落,大家可以改變心態!」

展覽分三部分——「一年」、「二十一天」和「片刻」,以一系列喺不同時期完成嘅繪畫,描繪生活中微小但可貴嘅瞬間,覺察大自然喺我們生活中嘅角色。「一年」係將佢過去一段日子隨時隨地用畫筆紀錄低嘅生活點滴,精選100幅,每張畫面配上文字,希望可以用多角度去睇事物。至於「二十一天」,劉解釋:「有人話三個星期會開始一個新習慣,於是我就俾自己一個任務,設計唔同大小形狀嘅畫框,連續21天出去大自然,睇睇有什麼可以入到腦袋。」至於「片刻」,就邀請觀眾參與創作,利用場內提供嘅紙同筆,俾大家擁抱屬於自己嘅空間。

藝術代替自己說話

講到同藝術嘅緣份,劉妍汶話好細個就喜歡畫畫,漸漸發覺藝術係代替自己說話同埋令人認識自己嘅方法。

中學畢業之後,佢去咗美國留學,喺美國加州大學柏克萊分校主修藝術,亦令佢對藝術有唔同嘅睇法:「同香港好不同,香港藝術教育著重技巧,但嚟到呢度,校方反而不追畫求技巧,追求你想講什麼,你嘅Idea是什麼?主題是什麼?」

Carmen仲話,喺美國讀藝術好開放,任何題材都會接受同欣賞:「以前喺香港畫情緒,大家會聚焦負面方面,怕感染其他人,但喺美國每樣都係中性,覺得藝術令大家發掘當中嘅深度。」

回歸自然

除咗藝術之外,Carmen好喜歡大自然,小時候會跟屋企人行山澗,大學時做好多Site Visit,見到山、湖等等,亦幫助佢將情感放入畫作中。

佢返香港後,任職商業機構,每年都會去一個遍遠嘅地方,例如坦桑尼亞、緬甸、印度等,喺大自然之中,佢發現人與大自然可以共存,當大家知道水同食物短缺嘅時候,就會好好珍惜,返到香港後,反而有啲迷失,於是佢決定裸辭,並喺機緣巧合之下,嚟到嘉道理農場。雖然每日交通時間超過三個鐘,但佢好享受呢度嘅一切:「喺大城市,好多人同事都會令自己無法集中,令自己好攰,但嚟到嘉道理,一切變得好慢,呢種景象令自己心好靜,找到自己嘅心聲,找到不同嘅變化!」亦係呢種環境,令佢重拾創作嘅動力,

「日出日樂‧As Time Goes By」展覽

日期:即日至823

地點:嘉道理農場暨植物園 藝舍

圖:LOOOP.HK

劉妍汶加入嘉道理農場以來,負責藝術教育及自然體驗活動,佢希望透過畫展,分享佢以繪畫探索環境與心境嘅瞬間。

展覽分三部分——「一年」以一系列喺不同時期完成嘅繪畫,描繪生活中微小但可貴嘅瞬間。


「一年」係將佢過去一段日子隨時隨地用畫筆紀錄低嘅生活點滴,精選100幅。


至於「二十一天」,Carmen特意將畫框吊起,希望吸引大家嘅好奇心。


Carmen設計唔同大小形狀嘅畫框,連續21天出去感受大自然。

至於「片刻」,Carmen就邀請觀眾參與創作,利用場內提供嘅紙同筆,俾大家擁抱屬於自己嘅空間。

Carmen裸辭之後,就開始畫小冊子,開頭無諗過可以做一個展覽,只係想記錄自己嘅感受,發現自己好enjoy,亦令自己有番自信。


早前佢憑自家作品贏得比賽,獲生活書院邀請,以素食為主題,創作及出版主題繪畫集。

Carmen回港後,每年都會去一些偏遠地區旅遊。去年便跟隨嘉道理農場中國保育部到柬埔寨Kratie Provience進行藝術教育計劃,以受保護動物為主題,在當地設施的外牆畫了一幅8米長的壁畫。又到坦桑尼亞當義工兩個星期,到四間不同與幼稚園和托兒所,以遊戲和藝術工作坊,讓他們認識自己的夢想。


Carmen表示,嚟到嘉道理之後,令自己身心放鬆!