美國藝術家Matjames Metson年少無知,喺18歲嗰年就做咗爸爸,點知囡囡Tyler出世無幾耐,Metson就因為未有心理準備做爸爸而拋妻棄女走佬逃避。不過,Metson之後一直承受沉重精神壓力,一度要入住療養院,出院後繼續做藝術創作,又做酒吧、送外賣等工作來養活自己。而Tyler嘅媽媽湊住Tyler,之後嫁俾第二個男人再重新組織家庭。原本大家各有各生活,兩父女應該唔會再重逢,結果一場風災改變咗佢哋之後嘅生活。

Metson嘅事業漸漸有起色,生活亦慢慢安定落來,點知一場大颱風令佢流離失所,失去大部分財物同藝術品。Metson靠朋友幫忙去咗洛杉磯生活,但就非常潦倒,試過窮到食狗糧充飢。就喺Metson絕望之際,佢16年前拋棄嘅女兒Tyler突然打電話俾佢。喺電話裏面,Metson問Tyler有無恨佢,Tyler嘅答案係:無。呢個電話令Metson重新振作,佢形容女兒嘅電話「不但救了我的命,亦改變了我的人生」。為咗留個好印象俾多年未見嘅囡囡,Metson重新投入創作,終於得以再次開藝術展。幾年後,Tyler專程搭飛機去洛杉磯同Metson見面,佢表示,自己同爸爸唔單止外表相似,仲一樣有藝術細胞。喺欣賞爸爸作品嘅時候,佢仲成日發現自己個名,佢相信咁意味住係自己俾咗爸爸再次奮鬥嘅動力。

圖:FB@Outlook, BBC World Service