本來以為可以緩和嘅新冠肺炎疫情,呢幾日再現本地感染個案,食物及衞生局局長陳肇始今日(9號)下晝公布最新嘅防疫抗疫措施,由星期六(11號)凌晨起至7月24號,食肆一枱限8人,入座人數唔可以超過座位嘅60%;酒吧、酒館唔可以多於4人一枱;電影院及公眾娛樂場所不得飲食。

陳肇始指,隨住疫情波動,有本地感染個案上升,要適時收緊唔同嘅措施以配合疫情。佢呼籲市民唔進食時一定要戴口罩,盡量避免同家人以外嘅朋友聚餐,盡量外賣同埋喺公司進食,同時減少外出。佢表示,希望通過邊境、社交距離措施以及檢疫檢測嘅措施,將個案維持喺本港嘅公共衞生以及醫療系統可以負荷嘅範圍,唔係期望病毒可以消失或者維持零感染。

圖:文匯報