塑膠污染近年越嚟越嚴重,除咗海水、海洋生物體內被驗出含有塑膠微粒之外,近排意大利一項研究仲發現,市面上唔少蔬果都含有塑膠微粒!人類製造出來嘅塑膠污染已經不知不覺殺到埋身,大家真係要快啲走塑喇!

國際學術期刊《環境研究》(Environmental Research)近日刊登一項研究,研究團隊喺多間超市、商店購入嘅蔬果清洗乾淨及去皮,然後用攪拌機分別打碎並脫水,再用顯微鏡分辨微膠粒。結果發現,我哋日常食開嘅多款水果、蔬菜都被驗出含微塑膠,當中以蘋果同梨嘅污染程度最嚴重,平均每克分別驗出含有超過19萬同18萬顆微膠粒。而蔬菜方面,紅蘿蔔平均每克有超過10萬顆微膠粒,西蘭花同生菜亦被驗出含有微膠粒。研究人員估計,蔬果係透過根部吸收微膠粒,有專家呼籲應盡快研究人體攝入微膠粒對健康嘅影響。

圖:網上圖片、綠色和平